Kadoffelkrebbel un Ebbelbrei
De Opa sitzt am Iibsche
un raacht sei stinkisch Kliibsche.
Die Katz, die leijht em uff de Fiiß,
do drauße is des Wedder miis.
Me maant die Welt wollt unnergeh.
Schon daachelang nix wie Ree.
Es wird aach gaanit hell.
Die Leut`- die laafe schnell.
Uff de Strooße do sinn grad
Pitsche wie e Waacherad.
Willste enibber – mußt de hibbe,
sonst bleib lieber dribbe.
Die Oma scheelt für die Kadoffelkrebbel
vorneweg die Ebbel.
Dann mescht se nebebei
erst emool de Ebbelbrei.
Un wenn die Pann rischdisch brozzelt
un die Krebbel sinn verhozzelt
kimmt noch Zucker obbedruff,
dann giiht dir gleisch de Maache uff!
Für so e guudes Hausmannsesse
kannste glatt e Kotlett vergesse!
Ei – billisch is es noch debei
„Kadoffelkrebbel un Ebbelbrei“.
– Ebbelbrei Apfelmus
– Iibsche Ofen
– Kliibsche Pfeife
– Ree Regen
– Pitsche Pfützen
– Maache Magen
Doris Lauck “E Brückelsche”
No Comments