Die Bescherung
Die Weihnachtspäckscher sinn gepackt
un sinn aach guud versteckt
Die Belsch – wie immer suche –
un habbe se entdeckt.
„Kaa Ecksche gibt`s im ganze Haus,
nit obbe un nit unne.
Egal wo immer ebbes leijt
se habbes schnell gefunne!
De Babba hot en schlaue Kopp,
er kam als erster druff:
Die Mülltonn werd nit mehr geleert,
die mescht aach kaaner uff.
Zwaa Daach noch – un in Sicherheit!
Die Kinner wern sisch freue,
wenn dann unnerm Weihnachtsbaam
die Päckscher drunner leije.
Die letzt Minut is aagebroche:
„Komm – Babba leer die Tonn,
des Christkinnsche soll komme,
die Kinner wadde schon.“
Was dann kam – des war nit zu fasse!
2, 4, 6, 8 Aache guckte ganz verschwomme!
Es war rein gas nix mehr zu mache –
die Mülleut warn zu früh gekomme.
Doris Lauck
No Comments