Mein Nochber un mei Kersche

Mein Nochber un mei Kersche

Mein Nochber daad ganz indressiert,
sei Schnut ging wie geschmiert:
mei Kersche hädde`s ihm aagedaa,
die weern so schee, grad wie mei Fraa!

Isch Dormel fall` uff den enei!
Holt` ihm des Kerbsche noch herbei
un saad: „Wenn se dich entzikke,
mei Fraa hilft dir beim Blikke.

Do sinn Laader, Hooge, Saalsche,
in de Kisch worschdelt ´s Malsche,
ruf se nur eraus,
du kennst disch jo hier aus!“

Zwaa Stund hockte die do drobbe
im Baam un daade Kersche robbe.
Mir is was dedemmert!
Isch warn wie belemmert,
batschnass im eischene Schweiß,
mol war mer`s kalt, mol war mer`s heiß.

„Ruhisch Blut“, hört isch misch saache.
„Der Schluckspesck kann was vertraache!“
Mei Spatzeflint – am Klaaderhaage –
hunn isch gemeeschlisch doschgelade –
un dodemit ganz unverdrosse
dem Gockel in de Aasch geschosse!

Kerbsche = Obstkorb
Laader = Leiter
Hooge = Haken
Saalsche = dickere Kordel / dünnes Seil
Schluckspesck = Geniesser / Liebhaber